韋斯布克潮做MVP！全明星周末重頭戲昨日假紐約舉行，以後備身份出戰的韋斯布克光芒四射，幾乎追平傳奇名宿張伯倫的得分紀錄，喪入41分協助西岸明星隊以163:158擊敗東岸明星隊，順理成章當選賽事MVP。這位雷霆球星更踩入Fashion界，獲服裝品牌True Religion委任為創作總監，「潮韋」今個全明星周末威到盡！

西岸明星隊 163:158 東岸明星隊
「潮韋」全晚多次表演入樽，睇到觀眾拍晒手。（美聯社圖片）

占士差3分先可以做到史上明星賽得分王。（法新社圖片）

加素兄弟兵同場上陣開創歷史。（美聯社圖片）

占士夏登交出準三雙數據，表現搶鏡。（美聯社圖片）

魯域斯基今場有一次「拆你屋」，連佢自己都勁High。（美聯社）

近5屆明星賽戰果

今屆全明星賽依舊星光熠熠，聯盟除了邀請了Christina Aguilera及Ariana Grande擔任表演嘉賓外，樂壇天后Rihanna及Beyonce均是座上客。3大常規賽MVP熱門人選包括勒邦占士、占士夏登及史堤芬居里屬焦點所在，當中一心爭做全明星賽得分王的「大帝」，甫落場已瘋狂搶攻並於首節攻入15分，不過鋒芒卻被韋斯布克蓋過。

超越佐敦 僅次張伯倫

後備落場的「潮韋」貫徹搏命作風，一次「拆你屋」更「High」到頭撼籃板，半場攻入27分的他創造全明星賽半場得分紀錄之餘，全場喪入41分更超越米高佐敦於1988年的紀錄（40分），僅次張伯倫（42分，1962年）成為全明星賽單場得分第2高球員。韋斯布克光芒四射，協助西岸明星隊報卻去年一敗之仇，以5分擊敗東岸明星隊，兩隊合共攻入321分，同樣刷新了全明星賽的最高得分紀錄。

力壓攻入30分的「大帝」，以及貢獻「29+8+8」的「大鬍子」勇奪MVP的韋斯布克賽後表示：「我根本唔知自己只係落後張伯倫1分，今場波我炒咗6、7個上籃，真係可惜！不過能夠同張伯倫及米高佐敦相提並論已經係一種榮耀。」

潮韋教着衫：最緊要做自己

場上光芒四射，場外亦一樣搶盡風頭，堪稱籃壇潮人的韋斯布克，於全明星周末期間曾出席紐約時裝周，明星賽前更獲True Religion委任為創作總監，「潮韋」稱：「我不嬲對Fashion有研究，着衫嚟講最緊要做番自己，唔好跟人，有機會嘅話我希望同Kanye West合作，相信我哋Crossover實會有大把設計上嘅新創意。」