萬眾期待，年度籃壇重頭戲NBA全明星賽明早假紐約麥迪遜廣場公園爆發！正所謂長江後浪推前浪，當今籃壇Icon勒邦占士不再「隻手遮天」，明早將率領東岸明星隊火併西岸明星隊，迎接兩位「後浪」史堤芬居里及占士夏登的挑戰，「大帝」除了想揚威這場「MVP前哨戰」，更希望超越高比拜仁及米高佐敦，爭做全明星賽「得分王」！

西岸明星隊

（now635台周一早上9:00直播）

今季NBA球星傷病不斷，「入樽王」格芬、「閃電俠」韋迪、「一眉狀元」安東尼戴維斯及高比拜仁均因傷退賽，當中「小飛俠」更因為要養傷講明不會到場，之不過今屆全明星賽依然大把睇頭。加素兄弟各為其主，創歷史成為全明星賽史上首對正選披甲的兄弟；「鷹隊4子」荷福特、高華、米沙比及泰古爾齊齊入選，亦證明毋須星味，只要有實力仍有出頭天。之不過講到最大看點，始終是占士的「帝位保衞戰」！

賽前認低威：「MVP形勢唔及佢哋」

今季重返騎士的占士依然交足貨，但鋒芒卻被勇士控衞史堤芬居里，以及火箭球星占士夏登蓋過，當中「咖喱仔」居里更打破「大帝」壟斷，「升呢」做今屆明星賽「票王」。雷霆王牌杜蘭特賽前加把嘴，揚言「大鬍子」今季比任何人更有資格奪常規賽最有價值球員，就連「大帝」都認低威，這位新任球員工會副主席表示：「居里同夏登喺常規賽MVP競爭上面，的確係比我秤先，但球季仲有一半，我同騎士會後上發力。」

連續10屆以正選身份出戰全明星賽的占士，目前於明星賽累積攻入248分，若明早能攻入33分，即可一舉超越「天勾」渣巴（251分）、「波神」米高佐敦（262分）及高比拜仁（280分），成為全明星賽「得分王」，預期「大帝」為省招牌肯定去盡，拒絕Hea打。

去年東岸憑艾榮大爆發，以163:155擊敗西岸，但以勇士教頭卡爾領軍的西岸明星隊猛將如雲，居里聯同夏登及奇利湯臣組成的後場已經得人驚，強如「雷霆孖寶」杜蘭特及韋斯布克都要做後備，西岸一心復仇，肯定好睇過戲。