熱火昨日作客快艇，憑後備中鋒韋西迪上陣29分鐘，交出23分、16個籃板的「雙雙」成績，以104:90怒炒主隊，終止作客3連敗頹勢。仕途坎坷的韋西迪去年曾獲快艇給予試訓機會，但終被球隊總監兼教練李華士否決而未能成行，難怪這位25歲小將賽後表示今戰是證明自己的代表作！

韋西迪爭番口氣，證明快艇唔要佢係損失。（美聯社圖片）

韋西迪（右）封阻格芬，技驚四座。（美聯社圖片）

NBA常規賽周三秩序

7呎高的韋西迪首節上陣已經取得12分及6個籃板，助熱火在落後6:19的劣勢下反超前，半場未完已造出「雙雙」，換邊後快艇仍未找到方法阻止這位馬歇爾大學出身的中鋒，後者在內線如魚得水，成為熱火以14分大炒快艇的一大功臣。

賽後轟入34分的保殊大讚韋西迪出色地控制了內線，低位每一項工作都完成得精彩絕倫。而曾拒絕給韋西迪機會的快艇教練李華士更說：「我哋完全冇好好地睇過佢打波，我相信另外29隊都一樣。佢今場打得相當出色。」

李華士跌眼鏡 黎巴嫩中國打過波

成功「報仇」的韋西迪就稱今仗意義重大：「我心中經常都有團火，所以代表熱火打波真係啱晒我胃口。我落場只係一心想盡全力比賽，去證明某啲人睇錯咗我！」

韋西迪出身於名不經傳的馬歇爾大學，較出名的前輩就只有前湖人教練迪安東尼及名人堂、76人名將賀爾基亞。韋西迪於2010年獲帝王於選秀會睇中，但一直都在發展聯盟度過。他在3年後決定出國發展，先後在黎巴嫩及中國打過波，去年回流NBA，尋找落腳地卻苦無好心人，幸得熱火教練史普斯達給予機會，才可在昨日打出「身價波」。