莎賓娜BB到港陪你迎新年！哈薩克排球美少女莎賓娜今年7月喺台灣參加亞洲青年女子排球錦標賽，憑住一雙大眼睛同一對長腿而紅爆亞洲，今日到港將出席多個活動，除夕仲會現身「奧海城活力動感迎2015」，同香港球迷一齊倒數迎接新年！莎賓娜BB嘅粉絲，Are you ready？

莎賓娜訪港行程

莎賓娜BB今年會同香港市民一齊喺奧海城倒數迎接2015年。不過，呢個唔係唯一一個見到呢位「12頭身美少女」嘅機會。莎賓娜今日到港將會有接機儀式，球迷可以近距離見到「排球美女」本人，聽日仲會喺奧海城舉行見面會，有入場證嘅粉絲仲可以同莎賓娜BB自拍留念添。

話晒都係排球女將，莎賓娜到港又點可以唔騷番兩手？佢29號將會喺青衣同香港女排青年代表進行交流，到時可睇到佢大顯身手。不過，戲肉都係除夕夜喺奧海城舉行嘅倒數活動，同場仲會有鄭嘉穎、胡鴻鈞同糖兄等藝人添。