2014多戀事 劉翔結婚最爆

有米「翔嫂」整容報細數？

劉翔娶老婆，比奧運傷退更爆炸！呢位中國「欄王」近兩年長期養傷做隱世居士，直到今年9月初，網上瘋傳佢同一名女子去登記結婚嘅相片，「劉天王」翌日就喺微博鋪合照公開戀情，隨後再由劉家兩老證實乖仔已娶24歲女演員葛天為妻，消息轟動中外，「翔嫂」更即時被起底，盛傳佢自細炫富、整過容、虛報年齡甚至被包養，睇嚟唔係好得「翔迷」歡心喎！

根據資料顯示，葛天2012年畢業於中央戲劇學院表演系，參演過電視劇《重案六組》、《青春大爆炸》等，名氣唔算大但家庭背景唔簡單，老竇葛學進係某航空公司前總裁。有人爆料話葛天讀大一嗰陣已經住高檔公寓，又不時喺社交網晒名牌手袋、衣服炫富，難怪畀同學懷疑佢被人包養。

另外亦有傳「翔嫂」報細年齡，出現26同31歲兩個版本，更大鑊嘅係，被指個樣似荷里活「女神」安祖蓮娜祖莉嘅佢，原來曾經整容，仲畀人拎番舊相出嚟做對比，果然發現判若兩人。其實31歲劉翔成家立室理應可喜可賀，弊在老婆負面新聞多籮籮，唔少「翔迷」都唔睇好呢段婚姻，不過「劉天王」一於少理，仲話會同老婆「努力造人」！幾時都話，愛情真係盲目嘅！

麥艾萊 禾琪訂婚變掟煲

體壇情侶離離合合本屬平常事，但北愛高球明星麥艾萊同丹麥網球手禾絲妮雅琪，5個月內由訂婚變掟煲就認真兒戲，「鬈毛」仲要用3分鐘電話講分手，之後又唱「禾琪」佗衰家，堅冇品！不過佢兩個分開咗，事業確實有起色，咁先最諷刺！

踏入2014年第一日，丹麥網球「甜心」「禾琪」就喺社交網公告天下答應咗「鬈毛」求婚，大家滿以為「禾麥戀」終能修成正果，殊不知麥艾萊喺5月中單方面宣布「分」訊，又話女方黑腳，搞到佢高球事業跌入低谷。慘被玩死嘅「禾琪」後來爆料，有日收到麥艾萊電話講分手，嗲唔夠3分鐘就收線，最騎呢係之前一日，「鬈毛」仲講緊有幾咁愛自己，搞到「禾琪」初時以為佢講笑，唉，你話幾Hurt呢！

奈何「鬈毛」撇甩「禾琪」即刻行大運，盛傳極速搭上愛爾蘭女模嘅佢，7月連贏英國公開賽同PGA錦標賽兩項大滿貫，鬼咁風騷；難得「禾琪」夠堅強，喺伊斯坦堡破錦標荒，又攞美網亞軍，撫平失戀傷痛，場外單身生活愈見精彩，年底更完成紐約馬拉松壯舉，贏盡掌聲，用行動話畀麥艾萊聽「活得比你好」！

菲比斯雙性姨姨有一手？

美國傳奇泳手菲比斯今年復出泳壇，比賽成績唔算突出，反而醜聞更惹關注。幾年前曾食大麻嘅佢死性不改，9月又衰醉駕被罰停賽兼接受戒酒治療，事後又畀法庭判囚1年緩刑18個月，仲要無啦啦有個41歲雙性姨姨自爆，話同「菲魚」有過一手……該煨囉！

搭上「小豬」伊雲娜域溝過界

講戰績實力，塞爾維亞網球「一姐」伊雲娜域唔算最Top，但勝在樣靚身材正，出道以來溝仔無數緋聞不絕，男友個個有番咁上下名氣，「娜姐」今年更「踩」入足球圈，搭上世界盃冠軍功臣、德國隊長「小豬」舒韋恩史迪加，你都咪話唔巴閉！

惹火尤物伊雲娜域先後同過「行家」華達斯高、羅伯度行埋，亦試過跨界同高球帥哥史葛拍拖，不過點都估唔到竟與大纜都扯唔埋嘅「小豬」撻得着！話說舒韋恩史迪加8月30歲牛一，女友莎拉冇喺生日P出現，傳媒已經覺得事有蹺蹊，之後伊雲娜域接受「冰桶挑戰」點名叫「小豬」找數更加有蠱惑，直到9月中德國《圖片報》登咗兩張佢兩個喺紐約十指緊扣嘅行街相，「娜豬戀」正式曝光！

新聞通天後唔少網友都覺得九唔搭八，其實「玩家」伊雲娜域冇段情長久，大家即管睇吓「娜豬戀」玩得幾耐囉！

孫楊 朴泰桓「拍拖」游亞運

中國「野孩子」孫楊同南韓「海洋男孩」朴泰桓係泳壇宿敵，喺場上鬥個你死我活，中韓兩地傳媒更不時製造火藥味話題，令外界誤以為佢兩個真係仇人，查實「孫朴」由細識到大，私底下Friend過打Band，今屆仁川亞運，呢對「基友」就大晒「恩愛」，比真正情侶更甜蜜。

「孫楊vs朴泰桓」被視為亞運世紀大戰，點知朴泰桓缺乏系統訓練，狀態跌Watt，游落完全冇得揮，但佢同孫楊「基情互動」更令人關注。「桓桓」喺200自、400自決賽後輕摸「楊楊」頭頂同下巴，4X100自接力領獎嗰陣又攬到實，去到游泳煞科日果然掀起高潮，孫楊贏完1500自即場幫「基友」慶生，親手送上寫咗「泰桓！生日快樂！」嘅生日蛋糕同一封「情書」，仲將蛋糕啲Cream撻落「桓桓」塊面，打情罵俏……呢幕簡直係仁川亞運最難忘畫面！

孫楊上個月被翻舊帳，原來早喺5月全國賽藥檢肥佬，即時停賽3個月，又一次做醜聞主角肯定心情差，唔知「桓桓」會唔會越洋送上安慰呢？

金妍兒怒飛偷食男友

金妍兒貴為南韓花滑「天之驕女」，迷倒唔少男粉，但勢估唔到綁唔住冰球男友個心！冬奧「被屈」痛失金牌嘅佢，原本諗住退役就可以體會吓「平凡人嘅幸福」，點知另一半竟然多次偷食，「女王」終於憤然提出分手，慘變「雙失冰后」。

金妍兒早喺2010年就讀高麗大學已經認識冰球國手金元中，兩人2012年2月重逢後撻着，直到今年3月畀狗仔隊拍到深夜約會先公開戀情，可惜好景不常，金元中6月底被踢爆走去色情按摩店Happy，又同隊友加埋幾個女子喺首爾夜店通宵狂歡，「女王」知道後嬲到炸開，毅然飛甩個「負心男」！不過亦有傳「廣告模特兒好感度」仲勁過全智賢嘅金妍兒係為咗「錢途」，回復單身冧贊助商至斬斷情絲。

孫延在想嗒「泳壇李敏鎬」

孫延在唔Like朴泰桓想嗒李敏鎬？呢位南韓藝術體操「精靈」獲緋聞男友朴泰桓現身打氣，大熱贏得仁川亞運金牌，兩人親密關係再成傳媒焦點，不過孫延在即澄清同「桓桓」只係「兄妹」，反而冧爆被網民封做「泳壇李敏鎬」嘅中國飛魚寧澤濤。

寧澤濤係乜水？佢喺亞運獨攬4金，更憑俊朗外形同六舊腹肌極速吸引大量女粉絲，「小鮮肉」一夜間升格做「男神」，畀班花癡瘋狂人肉搜查大起底，連孫延在都嗒晒糖，佢上月現身韓國KBS搞笑清談節目嗰陣仲大膽「表白」:「寧澤濤好帥啊！似足發光體一樣，兩隻眼睛都充滿『我要談戀愛，大家都嚟愛我啦』嘅感覺，電力十足。」

網球Big3結婚做老竇

要數體壇「幸福男」肯定非網球Big3莫屬！塞爾維亞「扮嘢王」祖高域贏完溫網就同大肚女友Jelena拉埋天窗，11月榮升做老竇冇耐，更加登上年終「一哥」寶座兼實現年終賽三連冠，囝囝認真好腳頭。

另邊廂33歲瑞士「球王」費達拿亦好令人羨慕，今季回春彈番上世界No.2，6月又喜添一對孖仔，加埋對孖女湊足兩個「好」字，上個月更首奪台維斯盃冠軍，家庭事業兩得意，搞到英國「天才」梅萊急急宣布訂婚，出年結束9年愛情長跑娶女友莎絲過門。相比之下，西班牙「野獸」拿度就運滯得多，雖然9奪法網寫下歷史，弊在下半季長期傷病，入廠割完盲腸又醫背脊……睇嚟「野獸」都要諗諗同女友Xisca早日成親，沖喜吓喇！