鷹隊狂炒騎士29分，「冇品大帝」遷怒記者！騎士昨日於主場迎戰鷹隊，防守漏洞太多終以98:127慘敗。今戰攻入21分的騎士「大帝」勒邦占士賽後心情「唔多靚」，於更衣室向記者發脾氣，輸波又輸品。

占士（中）比賽期間已相當忟憎。（美聯社圖片）

鷹隊（左）戰術奏效，打到騎士守將失晒位。（美聯社圖片）

NBA常規賽周六秩序

鷹隊戰術流暢 拍得住馬刺

鷹隊雖於首節落後，但其後藉傳球搓散騎士防線，因此外圍得到不少機會，全場28次於3分線外起手就有16次中鵠，半場18投12中更是隊史半場紀錄，當中後備控衞麥克全場6球全數命中，取得球隊最高的24分。比賽進入第4節時，主隊落後20分，教練比列見大勢已去，決定收起勒邦占士，變相「舉白旗」，終以29分慘敗，創下球隊今季最大敗仗。

騎士教練比列賽後稱：「球隊今場表現真係醜死人，我要向所有入場睇波嘅球迷道歉。」占士被問到有否因為大敗感尷尬時，即發火大罵：「你點解係都要問埋呢啲咁消極嘅問題？冇囉，我一啲都唔覺得尷尬囉。」他又稱鷹隊打法有如馬刺：「我哋畀咗鷹隊太多空位起手，佢哋打法好流暢，戰術令人覺得好似對馬刺咁，成日搞到我哋嘅防守球員失晒位。」騎士明日將於主場迎戰籃網，力求重返勝軌。

（now635台周六早上8:30直播）