港超將帥睇好C朗揮低美斯紐亞冧莊

「金球先生」邊個好？國際足協金球獎三甲名單尋日出爐，兩大球王C朗、美斯將會同德國門神紐亞爭奪殊榮。3位巨星今年都有輝煌戰績支持，亦各自擁有大批支持者，本報特別搵嚟一眾港超聯球員、教練以專業眼光評選，結果被博彩公司列為1.18倍頂頭大熱嘅C朗，獲港隊隊長陳偉豪等多名球星投以信任一票，莫非佢真係會順利冧莊？

世界足球先生同金球獎自2010年合併後，美斯率先連贏3屆，到上屆先畀C朗打破壟斷局面，國際足協尋日公布今屆終極3強，除咗「天敵」美斯同C朗之外，帶領德國贏得今夏世盃冠軍嘅門神紐亞亦大熱入圍。雖然3子過去1年戰績彪炳，但呼聲最高嘅C朗被博彩公司bet365列為1.18倍頂頭大熱，美斯同紐亞則冷到有7倍，賽果似乎呼之欲出。

C朗列1.18倍頂頭大熱

為此，本報搵嚟多位港超教練、球星對三甲人選進行點評，結果大多數人力捧C朗，已代表港隊投票嘅隊長陳偉豪都話：「我支持C朗，佢係皇馬攞上屆歐聯嘅最大功臣，入球又破晒紀錄，絕對值得贏金球獎。」傑志球星盧均宜亦話：「我心底係撐美斯，但現實的確係C朗表現更好，紐亞機會較微。」

要挑戰美斯、C朗壟斷局面嘅紐亞，亦得到葉鴻輝同張寶春支持，「英雄輝」話想見到龍門攞獎，標準流浪教練張寶春亦話：「我都係龍門出身，紐亞喺世盃同喺拜仁都踢得非常好。」要知道唯一贏過世界足球先生嘅門神，係1963年嘅蘇聯「八爪魚」耶辛，所以唔少人都撐紐亞再創歷史，有網民更開設「紐亞贏金球」社交網為佢造勢。