南華體能教練加斯頓去完旺角買Game之後，返到酒店又同紐維爾舊生會長洛倫迪（Dr. Guillermo Lorente）見面，兩個阿根廷人他鄉遇故知，即時雞啄唔斷。洛倫迪十分好人，接受本報記者突擊訪問嗰陣猛咁晒命，話球會已經成為國家隊嘅搖籃，培育出美斯等數名大國腳！

首次到港嘅洛倫迪大讚「東方之珠」好靚。

大讚球會冇得頂

洛倫迪第一次嚟香港，勁讚「東方之珠」好靚。佢話當年美斯仲係舊生青訓嘅時候，因為賀爾蒙生長素分泌不足，一直都好細粒。洛倫迪雖然知道佢有好高嘅足球天分，但係幫佢唔到，最後只可以將佢讓畀巴塞隆拿，造就佢嘅成名之路。洛倫迪被問及球會嘅發展狀況時，即時晒命話球會已經成為國內一流勁旅，多名國腳好似美斯咁，都係紐維爾舊生嘅出品。依家球會繼續以青訓為主，仲起咗幾間足球學校，學員又有書讀，又可以接受訓練，一箭雙鵰咁話。佢仲講到球會架構，全隊波28至30人，月薪由1萬美元起跳，以南美球隊嚟講，算得係富豪球會o架喇。