本報直擊馬斯真蘭奴做Gym後，尋日酒店保安明顯加強，住客必須出示房卡先可以進入電梯大堂範圍，健身室同泳池等亦加強巡查。

一班阿根廷Fans嘗試「突破防線」。

不過好多阿粉都不甘空手而回，有球迷就趁大軍喺一樓食飯嗰陣，「暗度陳倉」想由後樓梯「潛入」一樓，可惜好快被保安發現，全部「打回頭」。

另有一批球迷逐層搜索，或遊升降機河，希望可以遇到心儀球星。佢哋後來得知大軍入住8樓，就試圖「衝擊」。當升降機門打開時見冇人把守，兩名球迷就膽粗粗行出走廊，點知隨即就有兩名保安現身攔截，將佢哋推番入升降機。

不過，亦有成功集郵例子，有球迷見到本報影到馬斯真蘭奴健身，就喺健身房做住Gym守株待兔，最終又畀佢成功埋身同馬斯真蘭奴合照喎，真係恭喜晒。