阿根廷到港後除咗操練同比賽，一直都留喺酒店悶到爆，大軍助教Paolorroso惟有向南華體能教練兼同鄉加斯頓求救，佢尋日露口風指美斯勁懶瞓，瞓到黃朝白晏都唔願起身，然後仲托加斯頓出外買「fifa 15」解悶，本報記者見對方懇求，於是仗義帶路幫阿根廷買Game。

Paolorroso大爆美斯係懶瞓豬。

本報記者（右）帶埋加斯頓去買Game。

Paolorroso收到記者代買嘅遊戲，開波前可以玩餐飽啦。

「fifa 15」

南華體能教練加斯頓將件美斯簽名波衫送畀南華足主張廣勇。

成支阿根廷大軍留喺酒店，冇得去香港各個景點玩，實在嘥料，但原來美斯話瞓覺好過四圍遊，阿根廷助教Paolorroso同專程嚟酒店探班嘅南華體能教練加斯頓玩whatsapp，透露美斯原來係「懶瞓豬」，朝早11點仲未醒，到下晝再問多次又話瞓緊晏覺，唔知係悶得滯定真係鍾意大昏迷呢？

送多件南華波衫畀阿根廷助教

Paolorroso又突然提出請求，話想即刻買「fifa15」，問加斯頓香港邊度有得買呢隻由美斯做代言人嘅Game，話大家機癮發作，無Game喺手真係唔掂，所以向外求救，其實加斯頓今季先加入南華教練團，對香港唔太熟路，《東網》記者見狀當然要盡地主之誼要幫幫手，仲帶埋加斯頓去買Game添。

由於酒店附近百貨公司冇貨，記者惟有同加斯頓「飛的」去旺角「好景」買Game，Paolorroso要嘅貨係PS3版本，共費398港元，結果當然係順利完成任務，返酒店送畀Paolorroso，再搭多件南華波衫畀佢添，大家高興。