「勤力王」羅美路被禁操練！阿根廷大軍自從嚟到香港後，除咗練波外幾乎足不出戶，門神羅美路更加係鬥心爆棚，尋日朝早突然拎齊架生話想出去練波，可惜賽事推廣公司嚴禁球員未經批准外出，搞到羅美路要返酒店Gym房狂操發洩精力，真係要頒個「勤力獎」畀佢先得喇！

羅美路對球迷簽名合照要求來者不拒。

勤力做Gym

返酒店Gym房谷狀態

羅美路尋日朝11點左右同助教出現喺酒店大堂，各人帶齊足球同訓練設備，原來呢位門將係想出去練波，並喺南華足主張廣勇同南華助教協助下準備到旺角場加操，可惜賽事推廣公司職員拒絕「放人」，堅稱球員未經批准係唔可以擅自離開酒店。

雙方喺酒店門口拗咗一輪後，阿根廷教練最終都屈服，全程企喺一邊嘅羅美路雖然未能如願加操，但仍然表現得好Nice好識做，對球迷簽名要求全冇托手踭，最後仲自己返酒店Gym房狂練，呢種專業態度真係冇得頂！