雖然生吞「7蛋」，不過香港隊球員都有收穫嘅！其中後備入替嘅郭建邦，雖然多次被美斯扭過同「食塵」，但賽後都一臉滿足咁話：「都學到啲嘢嘅！咁佢係球王級，的確好勁，佢係我踢咁耐波最難對付嘅對手，呢幾十分鐘的確好難忘。」

安基斯×美斯

李威廉×希古恩

林嘉緯×天使

美斯主動同安基斯換波衫

同時，有幾名港腳成功「有嘢揸手」，上半場完場後，平日喺球場以速度見稱嘅李威廉，再一次展示「速度」，趁希古恩步出球場前成功跟對方換波衫；下半場換咗新衫繼續披甲嘅希古恩，完場後再同科夫換多次，一個人滿足咗兩位港腳嘅願望。

至於最多人「吼住」嘅美斯波衫，就畀後備入替嘅安基斯「遲嚟先上岸」，賽後興高采烈咁向傳媒展示「戰利品」：「美斯走過嚟同我講，話我係全隊表現最出色嗰個，所以唔使我問，佢就將波衫送咗畀我！呢份禮物太珍貴喇！我會將佢掛喺我屋企個客廳幅牆上面。」至於林嘉緯同盧均宜，就分別換到迪馬利亞同馬斯真蘭奴件戰衣，賽後更顯得極之興奮，亦令其他「失敗」嘅隊友，羨慕非常！