相信好多人都有同類經歷：事情發展得太快，一時間唔為意好大件事，過咗一排先諗起呢次不得了。今屆採訪仁川亞運，真係日日新奇，石偉雄前晚奪得跳馬金牌，尋日朝一早瞓醒，再諗一諗，原來香港出咗個亞運體操冠軍，真係好大件事！

講起真係可惜，石偉雄奪得跳馬冠軍一幕，香港傳媒都聚晒喺場地單車館，等候李慧詩上訴成功，之後再衝金成功，錯過咗現場見證呢個歷史時刻，只能事後補飛性質趕去體操館睇石仔玩單槓做訪問。

體操金牌有何意義？在小弟嘅認知中，亞運體操同奧運體操水平相差不遠，都係中國日本玩晒，金牌選手亦唔係平凡人，只有李寧、李小雙、楊威、李小鵬呢類猛人先攞到金牌，但依家香港出咗個體操冠軍啊！

今屆亞運港隊好神奇，港足入16強，賽艇爆個駱坤海，體操又有石偉雄，香港隊下一個金牌，真係唔知又喺邊度爆出來，可唔可以現場見證，真係要睇彩數。