李慧詩後來居上戲劇性奪金！「牛下女車神」李慧詩昨午在爭先賽在勁敵鍾天使犯規的情況下獲得終極爭金機會，並於第3場反勝該名中國車手戲劇性奪冠，贏得個人今屆第2面金牌，成為香港史上首位亞運單屆雙金得主。自爆過去4年狂煲過千場爭先賽鑽研戰術的Sarah，賽後獲「魔鬼教練」沈金康畀足100分！

李慧詩開心到舉起架單車。（美聯社圖片）

一屆亞運兩面金牌，李慧詩寫下香港歷史。（法新社圖片）

李慧詩（下）用4年時間換來一面爭先賽金牌。

鍾天使（左）第2場賽事犯規，令Sarah有翻身機會。

李慧詩昨於4強戰以2:0鍊贏中國代表林俊紅，躋身決賽後硬撼另一宿敵鍾天使，首場僅僅落敗的Sarah，於第2場再度不敵該位中國名將，不過大會指定時計天梭的攝錄機就監察到，鍾天使於最後200米霸佔對手線道犯規，令李慧詩上訴得直追成1:1，需到鬥最後一場分勝負。Sarah於第3場「睇定嚟食」，最後清脆力壓對手衝線，繼日前的競輪賽後再為港隊添金牌。

4年喪煲千場比賽錄像

場地單車項目曲終人散，香港總共進帳2金1銀，個人獨取兩金成為香港史上首位亞運單屆雙金得主的Sarah，賽後表現激動，兩次與沈金康擁抱，更High爆高舉單車慶祝。李慧詩去屆於爭先賽奪銅牌，賽後透露當年「唔識戰術死衝爛衝」，痛定思痛，過去4年喪睇過千場爭先賽比賽錄像鑽研戰術，如今終有回報。

沈金康畀足100分

李慧詩賽後受訪時表示，因犯規被判輸的鍾天使壓力較大，自己於第3場可以放膽踩，並自爆賽前緊張到「瞓唔着」：「比賽前幾晚緊張到失眠，直情聽到自己心跳聲。好多謝教練、工作人員、屋企人同傳媒嘅支持。爭先賽好難贏，以前對住鍾天使同林俊紅平均鬥5次先贏得1次，所以今日真係好激動，激動到唔記得自己舉起過架單車慶祝。」向來嚴格的沈教練，亦罕有地給予愛徒滿分：「我好少畀人100分，但Sarah今次最後200米嘅表現絕對值100分！」