尼馬瘋狂沉迷啤牌變「賭精」！唔少球星都鍾意喺賭場玩番兩手，巴塞隆拿前鋒尼馬近期就瘋狂沉迷撲克，自從世界盃受傷後一直「啤」不離手，甚至買咗張私家賭枱方便練習，尋日佢喺社交網Show出大疊籌碼晒命，講到明「我係嚟真！」傳聞尼馬準備參加公開比賽，同「啤王」隊友碧基較量吓！

尼馬大晒賭啤相，似乎好沉迷喎！

貪玩嘅尼馬平時同隊友都會玩吓啤，不過巴西媒體發現，呢位前鋒自世盃開始勁沉迷撲克，兩個月內已經4次喺社交網分享自己嘅「操啤」過程，《環球體育》透露尼馬早前斥1,200雷亞爾（約4,100港元）買咗張賭枱返屋企，上月底亦有粉絲影到尼馬同朋友賭啤，女友般娜企喺後面做阿四嘅相，唔知最近分手同尼馬掛住賭啤有冇關係呢？

巴塞6200萬 簽丹尼爾接班人

呢位巴西天王喺Instagram嘅最新發布，見到佢一臉嚴肅，大晒枱上三疊籌碼，而且留言話會「認真對待」，表明佢唔係只當啤牌係消閒節目，據聞佢已計劃參加正式嘅撲克比賽添。查實佢嘅巴塞隊友碧基亦係啤壇常客，03年曾經入過歐洲撲克巡迴賽決賽，唔知確認可以响西甲揭幕戰傷愈復出嘅尼馬，會唔會同碧基喺賭枱交鋒呢？

另據西班牙《每日體育報》尋晚爆料，巴塞隆拿已經傾掂600萬歐元（約6,200萬港元）收購聖保羅右閘杜格拉斯彭利拿，呢位24歲球星已同意簽約5年，預計日內就會正式公布。巴塞教練安歷基視佢為丹尼爾接班人，丹尼爾同巴塞合約明年完結後勢必走人。