尼馬同般娜掟煲,絕對係萬千少女嘅喜訊,估唔到回復單身嘅「新比利」話咁快就「搵到食」!疑似新任「尼女郎」嘅Mariana Cardoso早排已經介入「尼般戀」,日前仲上載魯營自拍相宣示主權,插定旗嘜實尼馬咁話喎!

尼馬新歡Mariana喺魯營自拍露玄機。(互聯網圖片)

「偷食男」艾蘭奴同「小三」玩完後,已經返番老婆(右)身邊。(互聯網圖片)

Mariana樣靚身材正,周不時都喺社交網「鋪」比堅尼相騷料,上個月般娜喺伊維薩島提前鬆人之後,Mariana突然現身陪尼馬遊山玩水,外界已經覺得佢兩個有「景轟」。呢位索女日前更透過instagram示威,上載咗張喺魯營嘅自拍相並留言話:「啱啱瞓醒,真係好掛住巴塞隆拿……」留言一出,Mariana個Friend即刻回應話「因為尼馬」,睇嚟Mariana同尼馬真係有啲嘢喎!

衰佬艾蘭奴偷食自首

男未婚女未嫁,尼馬仲有選擇權利,但千祈咪學巴西前輩艾蘭奴咁一腳踏兩船呀!呢位33歲法林明高中場之前背妻偷食,搭上女星Nivea Stelmann,Happy咗5個月之後就甩拖。呢個衰佬前日上電視「自首」:「我之前有第2個女人,我知自己做錯咗,依家我已經返番老婆身邊,唔同咗嘅係我嘅生活方式,我會周不時同屋企人去教堂。」

馬斯真蘭奴續約巴塞4年

懺悔呢招都畀你出埋,希望艾蘭奴真心悔改,咪再Hurt老婆,尼馬亦應該借鏡,唔好學似艾蘭奴咁花弗。講開「新比利」,佢嘅巴塞隊友馬斯真蘭奴會喺本月26號同會方續約4年至2018年,合約入面仲包含一項高達1億歐元(約10.3億港元)嘅違約金條款,似乎係想綁到佢收山。至於蘇亞雷斯尋日亦確認會留低踢星期二對利昂嘅甘柏盃,到時尼馬、沙維兩件傷兵都會落場試腳。