英超仲有唔夠1個星期就開咧，曼聯領隊尹戈爾竟然喺呢個時間玩大換血！據英、意傳媒報道，「紅魔鬼」有可能喺短期內送走7名球員，尹帥更將全部火力集中喺智利中場維達爾身上。據報維達爾嘅經理人前日抵達英國準備同曼聯終極會面，呢位智利國腳尋日隨祖雲達斯喺澳洲踢熱身賽，更搶先喺曼聯波衫簽名，真係心急成咁？

維達爾

過氣小豆 查維亞靴南迪斯

尹戈爾新季向香川真司投信任票。

簽曼聯波衫

曼聯聽朝會同華倫西亞踢熱身賽，亦係尹戈爾首度喺奧脫福領軍，呢位「魔君」經過早前試陣後，似乎已搵到明確組軍方向，今個星期好可能會出現大地震！曼聯增兵目標直指祖雲達斯中場維達爾，意大利媒體《足球市場》爆料，呢位智利國腳已同意18.2萬鎊（約237萬港元）周薪嘅5年合約，轉會費高達4,700萬鎊（約6.1億港元）！

空穴來風未必無因，《米蘭體育報》證實維達爾經理人費利斯域前日秘密飛抵倫敦，表面上係睇佢代表嘅另一球星阿歷斯山齊士踢社區盾，查實真正目的係同曼聯高層會面拍板。前日隨祖雲達斯去澳洲踢熱身賽嘅維達爾，更被影到大方為一名遞上曼聯波衫嘅球迷簽名，似乎對「紅魔鬼」幾有好感喎！

香川真司有得留低

有傳聞祖記提出要查維亞靴南迪斯作為交易一部分，相信曼聯亦唔會介意，因為英國《每日郵報》尋日爆料，尹戈爾尋日當面通知7名球員已被球會掛牌，當中包括查維亞靴南迪斯、費蘭尼、拿尼、路爾斯安達臣、拉菲爾達施華、韋費特沙夏同小將威爾堅尼，不過日本中場香川真司就獲投信任一票，有機會喺新球季證明自己。

想撬埋戴利白蘭特

其實尹戈爾對荷蘭後衞戴利白蘭特都好有興趣，仲願意向阿積士開出1,500萬鎊轉會費，不過呢位新星尋日暗示想去西甲搵食多過英超：「能夠同曼聯、巴塞隆拿呢啲大球會扯上關係無上光榮，我覺得西甲更加適合我嘅踢法，英超對抗性好激烈，體力踢法並非我強項。」尹戈爾要搶人，睇怕要落吓嘴頭啦！

至於曾經同朗尼大玩3P嘅真人騷艷女伍德豪言，要同已榮升紅魔助教嘅傑斯切磋「床上招式」，傑斯曾經被爆染有「性癮」，姣婆遇着脂粉客，唔知佢可唔可以抵受引誘呢？

最新轉會消息：魯爾占美尼斯

CF阿美利加（墨超）→馬德里體育會（西甲）

年齡/位置：23/前鋒

轉會費：未有透露

成事指數：★★★★★

簡評：CF阿美利加日前證實收到馬體會嘅報價，話條件唔錯，有機會放人，占美尼斯本人亦講明想轉投呢支西甲冠軍。

阿費利

巴塞隆拿（西甲）→奧林比亞高斯（希超）

年齡/位置：28/中場

轉會費：借用

成事指數：已落實

簡評：巴塞隆拿決定將得番一年約嘅阿費利，借到奧林比亞高斯，阿費利有可能會喺合約完咗之後加盟呢支希臘勁旅。