世盃進入高潮，周六凌晨兩場8強賽戲碼吸引，頭場法國大戰德國，尾場東道主巴西火併哥倫比亞，吸引大批市民落街睇波，其中將軍澳東港城及旺角銀龍茶餐廳都逼滿球迷，非常熱鬧。

喺茶餐廳同商場睇波都可以感受香港獨特睇波氣氛。

帶埋狗仔一齊同愛隊打氣！

充滿地道睇波文化

雖然頭場賽事有無綫翡翠台免費直播，但法國對德國好波在前，好多球迷都決定出街睇，例如將軍澳東港城就吸引到一班球迷到場，幾百人坐埋一齊欣賞呢場世盃經典對決，睇完頭場，尾場巴西對哥倫比亞等一陣又開波，由於只有收費電視台直播，令更多在家睇完頭場的球迷，都出街睇埋尾場，旺角有球賽直播的食肆都爆滿，距離尾場開賽前一小時，旺角銀龍茶餐廳門外已出現人龍，排隊等入場睇波，茶餐廳都好識趁機會做生意，設有最低消費，每位70港元，包一杯飲品及小食，其他食物另外收費，而且講明只做球迷生意，不做散客。

尾場開賽前，茶餐廳幾乎滿座，過百球迷分別圍着店內七部大電視觀看，茶餐廳睇波氣氛亦同商場有異，茶客動輒起哄、粗口橫飛，又不時拿出手機上網查看即場賠率，充滿地道睇波文化。

帶埋愛犬打氣

至於Mikiki嘅「狗狗睇波專區」亦直播8強德法大戰，並於開賽前舉行狗狗睇波派對，並設立狗狗睇波專區免費借用狗狗波衫，讓狗狗與主人一起為心儀球隊打氣。