哥斯達黎加球場內外一樣咁神奇！呢支「神奇球隊」場內獻上今屆世盃為止最大Surprise，昨晨憑拜仁雷斯一頭頂死意大利贏1:0，成為首支喺「死亡D組」突圍嘅球隊，時隔24年再度殺入世盃16強。場外就有不法商人搶閘生產老翻波衫搵銀，哥國總統蘇利斯更加High到上街同萬民慶祝，仲將「6‧20」呢個大日子稱為國家歷史紀念日，舉國歡騰！

意大利 0:1 哥斯達黎加

相信世盃開波前哥斯達黎加波衫冇乜人吼。

哥國總統（左）開心到上街同人民一齊慶祝。

位列「死亡D組」嘅哥斯達黎加，計牌面、人腳同往績都係全組最削嗰隊，偏偏呢支「神奇球隊」就連環創造奇迹，繼首輪分組賽反勝烏拉圭3:1之後，昨晨再以1:0砌低意大利，連殺兩支世界冠軍成為首支喺D組突圍嘅隊伍，真係講你都唔信。

巴拿馬邊境 起獲233件哥國老翻波衫

繼1990年之後再次躋身世盃次圈，哥斯達黎加被視為今屆世盃最大驚喜，據巴拿馬邊境警察透露，佢哋上星期三喺巴拿馬邊境截停咗一架貨車，起獲369件冒牌衫，當中有233件係哥斯達黎加嘅老翻波衫，估計市值4,000美元（約3.1萬港元），連翻版佬都走去翻，證明哥斯達黎加國家隊呢期係幾咁Hit。

總統蘇利斯：6‧20係國家歷史紀念日

賽前喺twitter貼中哥斯達黎加贏意大利1:0波膽嘅哥國總統蘇利斯，尋日畀公務員放假睇波，蘇利斯同屋企人喺總統府見證呢場歷史勝利之後，即刻去到首都聖何塞同過萬名國民慶祝，當地學校亦都提早放學，等學生哥參加慶祝活動。聖何塞市面一片紅海，着住哥斯達黎加紅色波衫嘅民眾，猛咁大叫「我哋做到了」、「我哋會成為世界冠軍」等口號，蘇利斯仲話，6月20日係國家歷史紀念日。

哥斯達黎加躋身16強全隊心雄，領隊路爾斯賓圖仲話唔會放過尾輪分組賽對手英格蘭：「我哋係出咗線，但爭小組首名好重要，一樣要認真備戰。」至於意大利主帥柏蘭迪利就讚哥斯達黎加唔係符碌，並睇好呢支奇兵可以走得更遠。

哥斯達黎加資多啲

•哥斯達黎加國內僅得5萬名註冊球員，英格蘭及意大利分別約有150萬。

•02及06年出戰世盃時陣中僅得3名海外聯賽球員，今屆有14人。

•前鋒比尼斯曾因為太窮，要做影印員賺車資去練波。

•哥斯達黎加足總主席伊度亞度.李，佢嘅父母為中國籍移民，雖然佢堅稱自己係「百分之百中國人」，但就完全唔識講或寫中文。

講緊乜：Historia：哥斯達黎加創歷史

尋日打開哥斯達黎加嘅傳媒網頁，例牌會見到「Historia」呢個字，呢個西班牙詞語解做「歷史」，即係大家都認為哥斯達黎加創造咗歷史。其實佢哋咁講都唔算誇大，因為哥斯達黎加先後打瓜嘅烏拉圭同意大利，都有前世盃冠軍嘅銜頭，對一個足球小國嚟講，又真係幾歷史性嘅。