輸大鑊仲要畀人「請食屎」,邊個咁慘情?之唔係C朗囉!葡萄牙昨日凌晨出師不利,喺G組首戰喪吞德國4蛋,隊友做唔到嘢已經夠無奈,最冇陰功係完場後竟然畀德國主帥勒夫陰到正,握咗佢撩完鼻屎隻手,呢日對葡國「萬人迷」嚟講簡直係噩夢!

C朗單天保至尊,踢到冇晒心機。(美聯社圖片)

葡萄牙前鋒艾達盧比斯(右)同曉姆斯爭頂。(法新社圖片)

德國 4:0 葡萄牙

兩度扯甩隊長臂章

葡萄牙全場處於劣勢,應屆金球獎得主C朗雖然好落力,弊在班手足實在太廢,比比「發作」頭撼湯馬士梅拿晨早領紅,前鋒曉高艾美達同左閘法比奧干查奧亦先後因為拉傷腳部肌肉傷出,孤掌難鳴嘅C朗喺「日耳曼兵團」嘅嚴密看管下勁惡踢,怪唔之呢位巨星都踢到躁,被電視鏡頭捕捉到佢喺完上半場前同完場後,兩度發火扯甩隊長臂章,似乎輸到唔想踢。

隊友幫唔到手已經夠陰功,最慘仲要係被「請食屎」!德國主帥勒夫雖然官仔骨骨,兼且有「師奶殺手」稱號,但呢位型佬有個壞習慣,就係勁鍾意撩鼻屎,4年前南非世盃佢就試過斷到正一正,被影到「撩完再食」嘅驚為天人片段。估唔到勒夫至今一樣咁撩得,昨仗德國大炒葡萄牙4蛋之後,勒夫竟然用隻撩完鼻屎嘅右手同C朗握手,全程都被電視鏡頭拍到,咁樣畀勒夫陰到,C朗真係陰功豬!

賽後封嘴拒受訪

賽後C朗灰到爆直奔更衣室,有記者本來想訪問佢,但都畀C朗請食檸檬:「有3位球員受訪,我唔係其中一位!」德媒亦唔放過C朗,《圖片報》指C朗觸球次數比守門員更少,《體育圖片報》更以「邊個係C朗?」作為賽後標題,適逢尋日係小C朗4歲「牛一」,希望C朗幫囝囝慶完生之後開心番啦!