【本報記者吳浩然利物浦直擊】第3屆渣打五人賽總決賽，喺英國時間周二圓滿結束，越南憑超強韌力喺決賽殺敗新加坡捧盃，我哋香港代表飛龍足球隊都唔弱，以極佳戰績殺入4強，之後仲喺盛大頒獎禮以勁chok黑超look型爆全場，而且仲揚言出年要捧盃而回添！

飛龍足球隊

飛龍喺香港過關斬將，得到出征晏菲路嘅機會，佢哋喺今次總決賽演出神勇，連贏越南、歐洲、巴基斯坦、印尼同孟加拉5支勁旅，並以小組首名躋身4強，雖然喺準決賽互射12碼輸畀新加坡，喺季軍戰亦以0:2不敵泰國，但今次「征英」之旅攞到殿軍，已經係香港球隊歷嚟征戰渣打五人賽嘅最佳成績。

戴黑超跳勁舞科拿 班尼斯都Like

飛龍隊長周志明話今次發揮唔錯，但晉級4強後班球員已經有啲攰，所以冇辦法喺法定時間解決新加坡，不過各隊員喺4強止步後依然躊躇滿志，豪言出年要再嚟晏菲路爭標！當晚渣打同利物浦齊齊喺Hilton酒店舉行頒獎禮，科拿同班尼斯兩大紅軍名宿負責頒獎，飛龍領取殿軍獎牌時個個戴晒黑超型爆大跳勁舞，氹到兩位名宿勁開心，科拿仲攞咗其中一副黑超嚟戴，一把年紀仲係咁搞鬼！