球場上再惡的球員，都敵不過至高無上的球證，不過1位叫希夫（Sean Heath）的小牛員工就不畏強權，公然向聯盟挑戰。事緣小牛本月2號主場不敵勇士一戰，客軍中鋒謝美奧尼爾（Jermaine O'Neal）完場前「守龍門」打走艾利斯（Monta Ellis）的絕殺上籃，奈何球證丹尼哥羅福卻視若無睹。

球證犯錯逍遙法外

任職小牛公共發布員的希夫冇選擇沉默，事後即透過twitter連發6個激進留言，鬧勻聯盟及球證哥羅福，包括「我哋等緊你（哥羅福）嘅道歉！」、「咁高水平嘅比賽冇籃框科技？」及「NBA不嬲咁黑暗，簡直係恥辱！」。

聯盟昨日宣布，小牛因為公開批評球證被判罰2.5萬美元（約19萬港元）。職、球員犯錯要罰款、停賽，球證犯錯就「逍遙法外」，呢份工咪好易做？「真英雄」希夫熱血敢言，希望小牛球迷能夠效法車路士Fans為被英格蘭足總罰錢的領隊莫連奴籌旗一樣，幫希夫籌旗交罰款啦。