鄧肯（Tim Duncan）引發溜馬內訌？籃壇「長青樹」鄧肯老而彌堅，時隔491日獲選為上周西岸最佳球員，昨仗更超越「大猩猩」伊榮（Patrick Ewing）的常規賽得分，兼且帶領馬刺以103:77大炒溜馬連贏18場，創造球隊最長連勝紀錄。可憐溜馬輸波將東岸「一哥」席位拱手相讓之餘，主將史堤芬遜（Lance Stephenson）及佐治希爾（George Hill）更當眾吵大鑊！

鄧肯（右）今場表現一般，但馬刺勝在整體實力平均，夠贏溜馬。（美聯社圖片）

NBA常規賽周四秩序

周二戰果

溜馬爆內訌

鄧肯昨仗雖只貢獻9分、6個籃板球及4次助攻，但仍足夠帶領馬刺作客以26分之差大勝溜馬，常規賽生涯總得分超越紐約人傳奇球星伊榮跳升到第19位，反觀溜馬最近連輸3場，中鋒希拔（Roy Hibbert）賽前更不點名批評隊友：「更衣室入面有啲人好自私，我已經討厭呢個話題，我哋傾咗成個月啦……我哋好努力但一定要傳波。」希拔插隊友，史堤芬遜同佐治希爾更於昨仗比賽中段羞家到吵大鑊，要勞煩隊友將兩人分開才能平息事件。溜馬現時處於內憂外患的環境，兼且同日熱火擊敗速龍後升上東岸第1，無疑對溜馬季後賽之路有影響。