要數現役NBA最「騎呢」射姿，相信除小牛老將馬利安（Shawn Marion）及公牛中鋒諾亞（Joakim Noah）之外，木狼射手奇雲馬田（Kevin Martin）亦肯定「走唔甩」！於NBA打滾了10年，射波依舊「肉肉酸酸」，不少球迷及教練都奇怪為何「K-Mart」不改良射姿，但計「B仔」話齋：「既然Work點解要改？」

馬田的木狼隊友哥利比華（Corey Brewer）以「肉酸」來形容「K-Mart」的單手推波投籃姿勢，但就對其投射命中率及博犯規技術讚不絕口。由帝王、火箭時代就與馬田合作無間的木狼主帥艾杜文（Rick Adelman），對於愛徒的「騎呢」射姿亦抱着「由得佢」的心態。

「冇手影捉」成殺着

查實「K-Mart」早前接受訪問時，就自爆自小養成「騎呢」射姿係有段古，馬田自幼便與比自己年長的街童鬥波，由於身材瘦削，剷籃必定「死路一條」，故此便要研發一門「冇手影捉」的高難度射姿對付一班大哥哥，久而久之便成為習慣。

「K-Mart」今季場均攻入19.4分，39%的3分投射命中率更是自08至09球季的生涯第2高，各位年輕人在倣效「MJ」與「Kobe」的「掩住半邊波」投籃的同時，應該反思射姿是否最適合自己，一味跟風就無Character啦，Right？