諾亞父子搶晒三巨頭鏡！昨晨NBA爆發「東岸冠軍前哨戰」，公牛中鋒諾亞（Joakim Noah）在網球名將老竇諾亞（Yannick Noah）浮誇打氣下，交出準三雙數據，帶領球隊加時以95:88滅火。被全場高呼做MVP的諾亞，賽後「唔認叻」指「戴歷羅斯（Derrick Rose）才是MVP」，好波又夠義氣，抵你受歡迎！

諾亞（右）喺老竇面前做番齣好戲。（法新社圖片）

NBA常規賽周三秩序

周一戰果

謙稱羅斯先係MVP

公牛昨於主場出擊一度落後熱火18分之多，不過老諾亞就不停於觀眾席為囝囝瘋狂打氣，當諾亞於第4節封走比士利（Michael Beasley）的投籃後，該位83年法網盟主更效法「封波狂人」莫湯保（Dikembe Mutombo）的招牌搖手指動作，加上多次激動地與公牛Fans擊掌均被電視台捕捉，「演出」比熱火三巨頭更搶鏡。

諾亞亦沒有令老竇失望，全場貢獻20分、12個籃板、7次助攻及5次封波，加上占美畢拿（Jimmy Butler）的貼身防守嘜到勒邦占士（LeBron James）僅得34%命中率，卒之帶領公牛經過加時後以7分之差贏波。被全場球迷高呼做MVP的諾亞，賽後表示：「MVP只得1個，佢係戴歷羅斯，同埋我對MVP冇乜興趣，攞冠軍指環先至最重要！」