洛杉磯最佳在快艇！快艇星級控衞基斯保羅（Chris Paul、CP3）昨日帶領球隊，作客以142:94怒炒同城死敵湖人，令「紫金軍團」慘吞隊史最大敗仗，CP3出色的表現證明了自己早前得到的「洛杉磯年度最佳運動員獎」是實至名歸！

快艇（藍衫）大炒湖人48分。（美聯社圖片）

湖人刷下隊史最大敗仗，球員冇晒面目見人。（法新社圖片）

NBA常規賽周日秩序

CP3上季帶領快艇贏得史上首個分區冠軍，又在常規賽4場橫掃湖人，大勇表現助他贏得第9屆洛杉磯體育頒獎禮年度最佳運動員大獎。28歲的他得獎後自稱深愛洛杉磯，能在洛城打波是一種榮譽，可以說是夢想成真。

紫金Fans挑釁自招惡果

湖人昨仗主場迎戰快艇的「洛杉磯內戰」，賽前有湖人球迷高舉一面繡有所有冠軍紀錄的紫金旗挑釁基斯保羅，強調湖人贏到16個總冠軍，才是真正的「洛城之王」。CP3起初未有理會，但主場球迷愈罵愈起勁，前者終於忍無可忍，揚言要「玩殘湖人」！

率快艇贏48分不自滿

基斯保羅講得出做得到，在比賽中貢獻13分、11次助攻，加上快艇另有7名球員得分達雙位數，最終以48分之差狂炒湖人，成為湖人創立以來最大敗仗。CP3賽後未有狂寸湖人，反而謙稱洛杉磯仍是湖人「地盤」：「呢個城市仲係屬於湖人，呢個係絕對嘅事實，不過依家我哋要專注比賽，繼續力求進步。」快艇現時氣勢如虹，明早於主場迎戰鷹隊。

（now635台周日早上11:30直播）