安東尼，加盟吧！公牛昨日鬥紐約人，憑中鋒諾亞（Joakim Noah）貢獻「三雙」，主場以109:90大炒紐約人。主場球迷在今仗費盡心思，呼籲今季後成自由身客隊王牌安東尼（Carmelo Anthony）轉投公牛，安東尼輸波後大吐苦水，更暗示有機會今夏投靠公牛。

公牛中鋒諾亞（黑衫）愈來愈有領袖風範。（美聯社圖片）

周一戰果

NBA常規賽周三秩序

公牛眾將今仗繼續將士用命的打法，在比賽初段已打出一段12:1的攻勢，而占美畢拿（Jimmy Butler）更在一次防守救波後，在觀察席由後場走到前場，認真落力。主隊今戰有7人得分達雙位數，當中諾亞貢獻13分、12個籃板及14次助攻。新加盟的射手費迪特（Jimmer Fredette）亦在比賽末段得到首次上陣機會，雖然只有3分鐘，仍貢獻兩分、兩個籃板。公牛最後以19分之差大炒藍橙軍團，取得4連勝後馬不停蹄，今日作客籃網。

公牛球迷印安東尼波衫

諾亞取得職業生涯第5次「大三元」，賽後謙稱刷新隊史中鋒單場助攻紀錄，全靠一班隊友：「今場咁多助攻都係多得一班隊友落力幫忙，我哋每場都有持續嘅進步。」大前鋒泰查吉遜（Taj Gibson）更將諾亞的表現形容為MVP級數：「諾亞打到成個常規賽MVP咁，仲有咩可以挑剔？佢真係愈嚟愈全面。」

今仗有公牛迷拉橫額呼籲客隊猛將安東尼，在今季後轉投芝加哥，更有Fans穿上印有其名字的球衣睇波。「甜瓜」安東尼賽後談及此事時亦示好：「我有見到呀，呢個係一個唔錯嘅現象。」不過對於會否以自由身加盟公牛，他就不置可否：「我唔知你（記者）想我講啲咩。我連聽日會點都冇去諗，依家只係專注打好今季嘅比賽。」

甜瓜插隊友冇決心

雖然未知今夏去向如何 ，但安東尼對紐約人的表現明顯心灰意冷。他說：「真係好難再有咩藉口解釋點解會輸。我真係好無奈，依家球隊好似無心戀戰一樣。今場咁輸好肉酸，完全冇贏波決心。」