「蝙蝠俠」占士教訓紐約人
熱火「大帝」勒邦占士(LeBron James)早前對雷霆被打爆鼻骨,昨日主場鬥紐約人時戴上黑色面罩,配上黑色波衫,變身成「蝙蝠俠」。雖然LBJ今仗表現神勇,帶領球隊主場大勝紐約人,不過「大帝」賽後直言不喜歡戴面罩,然而為了上陣贏波惟有頂硬上!
着黑衫戴黑面罩的占士型爆!(美聯社圖片)
紐約人「甜瓜」安東尼(左)畀占士搶晒鏡。(美聯社圖片)
周五戰果
NBA常規賽周日秩序
熱火隊友教練讚有型
上場對公牛休戰的「大帝」,今場戴上黑色炭纖維保護面罩作賽,表現未受鼻骨傷勢影響,全場19投13中攻入全場最高31分,帶領球隊主場以108:82大炒死敵紐約人。LBJ賽後稱比賽時曾被面罩阻擋視線:「有時我睇唔到人,淨係望到面罩內側,不過,好在最後都習慣戴住面罩打波,雖然我唔鍾意戴面罩,但係依家惟有習慣新Look。」
「大帝」不喜歡這個新造型,但其熱火隊友就大讚他有型,前鋒保殊(Chris Bosh)說:「佢打到好似蝙蝠俠咁,個面罩真係對佢有幫助。」教練史普斯達(Erik Spoelstra)則說:「我覺得個面罩好型,佢帶咗之後更有威勢。」熱火大炒紐約人取得6連勝後,得到一日的休息,周日會在主場出戰魔術。(開賽時間:周日早上8:30)