金東炫備戰不忘「睇星星」！終極格鬥冠軍賽「UFC澳門格鬥之夜」暨《終極鬥士》，本周六在澳門金光綜藝館舉行，重頭戲由南韓金東炫對英國海瑟威。其中曾參演《Running Man》的金東炫，原來都是Hit爆韓劇《來自星星的你》的忠實狂迷，更揚言「千頌伊」全智賢是他理想對象呢！

金東炫坦言因為要練拳，所以只能「快睇星星」，但教練就「煲到癲晒」：「其實我都好想睇，因為我好鍾意全智賢，我好希望有個全智賢類型的女朋友。」講到今場賽事，由於在亞洲區舉行，適應並無困難，期望有好演出。

至於海瑟威上周六已來港備戰，今場賽事他有一定優勢，因為既冇煲韓劇，更非曼聯迷，對「紅魔」在歐聯淨吞雙蛋無動於衷，更反問記者曼聯對邊隊：「欖球才是我『飛佛』，下月的香港七人欖球或會令我分心，但現時我只會專心準備戰鬥。」另外，居港兩年的31歲巴西選手阿爾伯特米納，將代表香港上陣。

海瑟威愛睇欖球

格鬥之夜除了比賽刺激，負責舉牌的Ring Girl亦甚具瞄頭，包括香港模特兒Jessica C，以及前日本環球小姐參選佳麗西垣梓，後者更大放生電，卒成功與金東炫合照兼交換電話。西垣梓表示希望在香港結識男朋友，又向記者打聽香港男仔是否很好人：「日本男仔都很好，可是大部分都太嚴肅，我喜歡活躍，比較好玩調皮的類型。」