「倒米」雙雄齊輸波！塘鵝繼恐怖吉祥物Pierre之後，再推「恐怖Baby」賀新奧爾良節日「懺悔星期二」，嚇到眾將昨日被快艇大炒。而76人在主將埃文特納（Evan Turner）交易到溜馬後，球隊變得毫無星味，同日亦被東岸「魚腩」公鹿狂炒20分！

76人（白衫）再唔諗諗計好快冇晒班球迷。（美聯社圖片）

NBA常規賽周四秩序

周二戰果

76人球迷睇到瞓

塘鵝今季改名推出的吉祥物Pierre，由於樣衰得太恐怖，最後球會要在明星賽周末前推出Pierre 2.0，改善其形象。惟球會日前為懺悔星期二推出的「King Cake Baby」又再出事，這個巨型BB瞪大眼的笑容恐怖，十足魔鬼怪嬰，連啦啦隊索女與他合照亦被嚇到，笑得極不自然。球隊或被這巨型BB嚇到失魂落魄，對快艇時防守鬆散，最後主場以110:123大敗。

至於76人昨日主場對公鹿，打出聯盟最差防守的水準，被客隊射手美奧（O.J. Myao）射入7球3分，最後以110:130分輸波，慘吞11連敗；毫無星味加球隊輸波，令坐場邊位的Fans睇到「瞌着」。