Uncle Drew出城爆冷奪明星賽MVP！騎士控衞艾榮（Kyrie Irving、Uncle Drew）昨日在全明星賽表現出色，助東岸明星隊贏波之餘，更力壓「大帝」勒邦占士（LeBron James）等一眾巨星當選MVP。不過，「鄉下仔」艾榮可能措手不及感到緊張，獲獎後居然不知所措，要「大帝」等人即時教路先識高舉獎盃！

格芬全場係咁鋤樽，入咗38分。（法新社圖片）

艾榮唔記得舉高獎座，結果引起一陣歡笑。（法新社圖片）

姚明呢張相畀人笑用photoshop改過。（美聯社圖片）

高比（右）唔打得都畀面出席。（法新社圖片）

NBA常規賽周三秩序

格芬喪入19球

今年明星賽前3節玩味性質較重，到第4節雙方終於認真，最終東岸在高比拜仁（Kobe Bryant）及姚明等巨星前，以破得分總和紀錄的163:155擊敗西岸明星隊，一洗連輸3年的頹風。雖然西岸有杜蘭特（Kevin Durant）及格芬（Blake Griffin）均攻入38分，後者更射入19球刷新明星賽紀錄，但Uncle Drew貢獻31分、14次助攻，包括下半場狂轟平明星賽半場得分紀錄的24分，成為東岸贏波功臣。他的表現獲球迷肯定，結果擊敗攻入22分、但7球3分「炒晒」的LBJ，以及射入破紀錄8球3分的安東尼（Carmelo Anthony）成為MVP。

艾榮接過獎座後未捧盃就接受訪問，一班巨星前輩即時提點他要舉過頭頂，好讓球迷見到獎座。事後被問到捧盃手勢生疏一事，艾榮笑說：「其實係大家一齊出聲提我球星係點樣捧盃啫。」他並稱自己不在乎誰當選MVP：「其實我做唔做到MVP都冇所謂，我比較在意喺明星賽之後可唔可以保持一樣嘅高水準，幫騎士贏波比較重要。」

勒邦占士即時「扮大佬」稱自己一向睇好艾榮：「我向來都知艾榮好波，好高興佢奪得MVP，我為佢感到驕傲！」

標羅素記仇狂寸占士

明星賽中場休息時，名宿魔術手莊遜（Earvin Johnson）帶領全場大合唱，為上周三迎來80歲大壽的名將標羅素（Bill Russell）獻上生日歌。東、西岸兩隊球員其後逐一向標羅素道賀。據美國傳媒指，當LBJ與標羅素握手時，後者重提早前LBJ自比NBA最偉大的4名球員之一，將標羅素排除在外一事。標羅素狂寸LBJ：「多謝你冇將我放喺你個名單入面，籃球係團體運動，個人榮譽一啲都唔重要。我職業生涯一共贏咗11次總冠軍，占士先生，呢一切都深深刻喺歷史入面。」