籃網得分手祖莊遜（Joe Johnson）日前為明日的3分賽備戰，練習完畢後向傳媒表示，今年目標是超越2005年取得的8分，認真冇大志！事實上，在3分賽改制下，JJ要破紀錄可謂毫無難度。

目標超越8分

祖莊遜周二完成球隊訓練後，就進行3分賽的模擬練習。備戰後JJ說目標並非奪冠：「我淨係想打破自己上次（2005年）參賽嘅紀錄，當年我喺鳳凰城入到8分，所以今次可以打破呢個分數已經好開心。」

今年3分賽改制，5個球架會有一個全部都放money balls（每球２分），由球員任意擺放在5個定點的其中一點。不過JJ仍未決定放在哪一點：「我想將個架放喺底線，但係放喺首尾任何一點都唔係咁好。我可能將money balls個架放喺尾二個位，但都係到時先算。」據聯盟統計，祖莊遜在面向籃框左邊牛角位對出（49.1%）及左邊底線（42.9%）最準，這個數據或有助JJ的決定。