中國「天王」丁俊暉又嚟料，尋日喺德國大師賽以9:5擊敗「準神」卓林普，打響馬年頭炮，捧走佢喺今季第4個排名賽冠軍，媲美兩代「球王」戴維斯同亨特利成就，呢個亦係「小丁」職業生涯第10項排名賽錦標，成為「80後」球手第一人。
袋走8萬歐元（約84萬港元）獎金過肥年嘅丁俊暉賽後表示；「能夠喺農曆年期間捧盃好開心，就當送畀大家同自己一份最好嘅新年禮物。」臨時世界排名穩守第3嘅「小丁」仲豪言話未來有大把紀錄等住佢破，希望贏埋下半季其他比賽，信心爆棚！
