無綫電視尋日宣布，佢哋獲得國際奧委會授予俄羅斯索契2014「第22屆冬季奧運會」香港區獨家轉播權，跨媒體包括電視、收費電視、互聯網同流動平台，賽事喺2月7日至23日舉行，無綫電視將於2月7日起會有賽事直播同埋播放賽事精華。至於將代表香港出戰短道速滑1,500米項目嘅20歲男子運動員呂品韜，尋日就話領隊葉小燕不獲安排入住選手村，要喺村外住酒店，好擔心佢嘅安全。
