應屆澳網女單得主李娜「黑面領獎金」事件鬧到滿城風雨，尋日有國內傳媒搵到一段2001年全運會陳年舊片，片段入面李娜喺混雙賽事攞到銅牌之後，竟然喺頒獎禮上被疑似係湖北副團長肖愛山兜巴摑，一眾傳媒揣測「娜姐」因為對呢次屈辱揮之不去，所以喺湖北省領獎金嗰時塊面先至黑過鑊燶。

呢條13年前嘅片段尋日喺網上瘋傳，當時李娜同朱本強為湖北取得一面九運會網球混雙銅牌，冠軍則係姜山同李婷，片中頒獎嘉賓向戴住鴨嘴帽嘅李娜左邊面摑咗一巴，摑佢嘅疑似係湖北副團長肖愛山。有傳媒指李娜不滿當時被拆散同姜山呢對情侶檔，加上眾目睽睽被摑備受屈辱，所以日前由墨爾本回國時擺出一副「生人勿近」款，唔接鮮花、不發一言，繼而喺湖北省獲頒發80萬人民幣獎金時又木口木面。

不過網球手李婷隨後以目擊者身份，駁斥領導當年冇掌摑李娜，只係幫娜姐抹眼淚安撫佢，令外界對呢單嘢眾說紛云。

今次亦有唔少網民批評湖北向李娜發放80萬人民幣獎金嘥政府錢，湖北體育局局長胡德春就回應話：「李娜這次在澳網奪冠，是含金量很高的世界冠軍，依照湖北省的冠軍獎勵標準給李娜發獎金，沒有任何違規的問題，不光是李娜，任何一個世界冠軍或全運冠軍，都會得到政府獎勵，我們是依政策辦事。」網友對「黑面事件」有唔同睇法，有人撐「娜姐有性格」，亦有人踩佢「紅咗之後唔識人」。