熱火開P開到腳軟？NBA衞冕隊伍熱火昨晨為比士利（Michael Beasley）慶祝25歲生日，一眾戰將狂歡到凌晨1點，可能玩得太癲搞到個個腳軟，昨日造訪紐約人一戰表現大走樣，「閃電俠」韋迪（Dwyane Wade）更罕有地6個罰球全炒，連累熱火以92:102不敵紐約人，三連勝紀錄斷纜。

NBA常規賽周日秩序

周五戰果

大部分熱火球員都有出席比士利的生日派對，「大帝」勒邦占士（LeBron James）更攜同妻子莎雲娜（Savannah Brinson）到場。熱火今仗表現失準，攻入32分的「大帝」失誤有6次，第2節更被紐約人球星安東尼（Carmelo Anthony）「成分爆開」表演雙手入樽。相反紐約人全隊命中率高達54%，最後以10分大炒熱火，取得今季首次三連勝。

6次罰球全炒的韋迪，賽後拒為輸波「孭鑊」：「我又唔係射失20球，射失6球都唔係咁差啫！」另外，紐約人射手JR史密夫（JR Smith）因「鞋帶門」風波被罰款5萬美元（約39萬港元），今仗更被教練活臣（Mike Woodson）放入雪櫃，盛傳隨時被踢走。