勒邦占士（LeBron James）牛一悲喜交集！美國時間今日是「大帝」29歲生日，兩代摔角界冠軍級人物施拿（John Cena）及「蠍子王」狄維莊遜（Dwayne Johnson）爭住送金腰帶賀壽，不過「名嘴」堅尼史密夫（Kenny Smith）就寸爆叫占士接受禿頭現實，擺明贈興！

占士經常被取笑髮線後移。

周一戰果

NBA常規賽周三秩序

8歲舊車畀商人拍賣搵銀

「大帝」牛一全美國關注，據《sportingnews》報道，有商人食住條水，將占士於18歲曾經駕駛過、原價5萬美元的吉普車放上ebay拍賣，截至昨日為止，已錄得超過27次競投，預期競投價勢必衝破7萬美元（約54.2萬港元）大關。

占士年薪過千萬「要乜有乜」，偏偏就對WWE（世界摔角娛樂）冠軍金腰帶情有獨鍾，昨日就透過twitter表示想要一條，豈料11屆WWE盟主施拿立刻回覆：「你想要一條？我可能畀到你喎！」及後就連憑飾演「蠍子王」於荷里活大紅大紫的狄維莊遜亦表示會幫占士「搞掂」，兩大摔角冠軍爭住獻殷勤為「大帝」賀壽，足證占士勁有地位。之不過出名口臭的《TNT》講波佬堅尼史密夫就認真衰格，昨日竟公然狂窒占士：「唔好再用頭帶遮醜，索性剃光頭接受髮線後移嘅現實啦，占士！」

落場無兄弟KD搞掂火箭

另方面，杜蘭特（Kevin Durant）昨日攻入全場最高的33分，協助雷霆以117:86大勝有好兄弟占士夏登（James Harden）壓陣的火箭，明撼西岸新貴拓荒者實有好戲睇。（開賽時間：周三早上9:00）