「大帝」、「潮韋」聖誕做主角！NBA「聖誕大戰」年年矚目，但隨着戴歷羅斯（Derrick Rose）及高比拜仁（Kobe Bryant）養傷，確實令今個Christmas失色不少。好在勒邦占士（LeBron James）昨日不但率領熱火贏波追平「公牛王朝」的聖誕紀錄，賽前更與「小飛俠」上演一幕「世紀擁抱」，與一身潮爆打扮踩場的雷霆球星韋斯布克（Russell Westbrook）鬥搶鏡！

淨係呢吓入樽，占士都搶晒鏡啦！（法新社圖片）

占士（右）上前攬住高比，果然識英雄重英雄。（美聯社圖片）

NBA常規賽周六秩序

周四戰果

NBA昨日安排了5場「聖誕大戰」，當中衞冕隊伍熱火就藉保殊（Chris Bosh）、韋迪（Dwyane Wade）及占士合力貢獻65分，作客101:95擊敗湖人。全場貢獻「19+8+4」的「大帝」多次「拆你屋」都贏盡掌聲，賽前更主動與一身西裝到場的「小飛俠」擁抱，兩位「波神接班人」識英雄重英雄，占士又謀殺不少菲林。

熱火贏波平公牛紀錄

擊敗湖人之後，熱火已經連續5年於「聖誕大戰」贏波，追平公牛由90至94年的「聖誕5連捷」紀錄。賽後占士貫徹牙擦作風，稱「有必要奉獻一場精彩聖誕大戰」，暗寸昨晨舉行的兩場常規賽（公牛95:78勝籃網、雷霆123:94勝紐約人）實力懸殊。

韋斯布克玩到拖埋地

同樣鍾意出風頭的韋斯布克，繼去季的紅框眼鏡Look惹來一時佳話之後，昨晨又有新突破，以一身全黑「圍裙Look」踩入麥迪遜廣場，並襯上一條勁粗金鏈，勢必再成NBA潮流熱話。昨仗交出「三雙」的「潮韋」心情大靚，比賽期間更百厭到搶走工作人員的地拖幫手拖地，又再搶鏡成功，明早率領雷霆造訪山貓，隨時又有新搞作。