「黑妹」葉 延向來喜歡製作甜品小食，剛榮升蛋糕店老闆的她，最近更「的」起心肝，跟師傅學整卷蛋蛋糕，好讓身邊好友在這個聖誕佳節大飽口福。這位香港羽毛球女將原來還有個心願：「我的夢想是將來可以擁有以自己命名的咖啡店！」

港羽一姐 葉姵延

揀工具～

試吓先～

「黑妹」是香港體壇中出名的「整餅師傅」，不少好友都嘗過她的「作品」。「一直都有研究整嘢食，以前體院pantry好方便，我喺嗰度都整過好多次蛋糕，香蕉蛋糕、芝士蛋糕都整過，Sarah（單車女將李慧詩）同Carmen（賽艇選手李嘉文）亦品嘗過好多次，我亦會因應佢哋口味，整啲低脂肪嘅，佢哋都話鍾意食。」最近「黑妹」入股蛋糕店做老闆，店舖以售賣卷蛋為主打，卻非她擅長的類別。「咁無理由間舖賣卷蛋，我竟然唔識整o架！所以決定搵師傅學，學識咗之後第日整完拎出嚟賣都好吖！」「黑妹」笑言。

表現認真 師傅畀8分

後來「黑妹」透過互聯網知道「W Cake」開班，決定報名一試。這天在本報記者見證下，終於跟師傅Wilson上了第一堂，學習製作以Line卡通人物為造型的卷蛋。製作過程中，「黑妹」表現得十分認真，只是在最後關頭有點蝦碌。「黑妹」解釋：「之前整嗰啲蛋糕，材料好多，好複雜，呢次卷蛋就比較簡單，最難係要畫公仔，同埋捲嘅過程。捲嘅時候要花啲心機，溫柔啲，始終自己係粗魯型，所以有點難度。」

師傅Wilson則表示，在製作蛋糕類別中，卷蛋只屬初級難度，他認為「黑妹」的表現已很好：「10分滿分嘅話，我會畀黑妹8分。可能佢打慣羽毛球，身手較好，好快就上手，只係差少少經驗。其實整蛋糕都係工多藝熟，除咗天分，最緊要係多加練習。」

夢想賣咖啡 開「黑妹Cafe」

「黑妹」大叫一聲Yeah之後補充：「其實我有另一個夢想，就係開咖啡店，可以畀人坐得好舒服嗰啲，如果可以用自己個名，叫『黑妹Cafe』都唔錯！」

3D Line 聖誕卷蛋蛋糕：材料及分量

蛋白120g

蛋黃80g

水10g

沙糖60g

低筋麵粉80g

油20g

可可粉5g

做法

1.把蛋白打起，並慢慢加入3分2沙糖

2.將餘下3分1沙糖加入蛋黃並打起

3.將蛋白加入蛋黃，隨後攪勻

4.慢慢加入篩好的麵粉，攪勻

5.加入油及水，攪勻

6.抽出少量，加上可可粉，攪勻，跟隨式樣畫圖

7.放入已預熱170度的焗爐，焗2分鐘

8.焗完後拿出，將剛才的材料倒進爐盤

9.放入已預熱170度的焗爐，焗15分鐘

10.打起甜忌廉，然後塗上蛋糕，再細心捲起

11.放入雪櫃1小時