湖人球迷最近連環接獲喜訊，除了高比拜仁（Kobe Bryant）今日強勢復出，另一老將拿殊（Steve Nash）亦已重新投入操練。這位39歲老將為回歸造勢，宣布個人紀錄片《NASH》將於明年4月上映，籃壇巨星如姚明（Yao Ming）、高比拜仁甚至「萬人迷」碧咸（David Beckham）都有份客串撐場，拿殊都算有Face咯！

NBA常規賽周二秩序

周日戰果

拿殊職業生涯成就輝煌，紀錄片當然講述這位控衞如何兩奪最有價值球員（MVP）及帶領太陽殺入2012年西岸決賽的豐功偉績。據悉，由於拿殊於2012年夏天轉投湖人，導演米高咸美頓（Michael Hamilton）要「補戲」重拍片尾，製作勁認真。

導演：表達拿殊追夢訊息

除了場內威水史，這部紀錄片更有一些拿殊於場外鮮為人知的故事，不過導演米高咸美頓就大賣關子：「拿殊好多私人生活趣事大家未必知，想睇就真係要入場。同埋我想強調，製作呢部紀錄片並唔係因為拿殊嘅職業生涯去到尾聲，而係我想藉住電影帶畀大家一個訊息，就係好似拿殊咁成功嘅人，都要通過不斷訓練去追夢，佢絕對係後輩嘅榜樣。」

《NASH》將於明年4月中在多倫多或溫哥華作首映，從NBA官網所發布的宣傳片所見，美國總統奧巴馬、籃壇巨星魯域斯基（Dirk Nowitzki）、「小飛俠」高比拜仁、姚明、「萬人迷」碧咸及影星奧雲威爾遜（Owen Wilson）都有份參演，陣容可謂星光熠熠。紀錄片收益將全數撥捐拿殊基金會，有星睇又可以做善事，《NASH》紀錄片肯定賣座！