黑客入侵FIFA電腦 巴西英格蘭內定同組?
世界盃黑幕重重!世界盃分組賽抽籤喺香港時間12月7號凌晨舉行,不過尋日就接連爆出醜聞,一班黑客據稱成功入侵國際足協(FIFA)總部電腦,並發現抽籤結果早已內定,巴西、英格蘭、法國同墨西哥將被編入死亡A組!兼且外圍賽被爆涉及假波,白禮達又捲入種族歧視指控,今屆世盃認真多事。
英格蘭(右)同法國傳內定喺分組賽碰頭。
墨西哥網站《El Deforma》尋日爆出獨家猛料,一班電腦黑客報稱闖入FIFA電腦後,發現世界盃分組已被內定,FIFA喺贊助商壓力下需要製造話題之戰,所以分組出現唔少強勁戲碼,好似德國同荷蘭上演宿敵大戰,阿根廷嘅美斯同葡萄牙嘅C朗拿度亦會提早碰頭,巴西更會同英格蘭、法國身處死亡之組!
拘兩星洲疑犯 外圍賽都造假
英國《太陽報》亦有報道呢宗醜聞,FIFA發言人尋日回應,證實總部電腦的確曾被入侵:「FIFA電腦喺星期三曾經受到襲擊,不過我哋絕對冇任何關於世盃分組賽抽籤結果嘅資料,就連抽籤過程同安排嘅詳情都未決定。」至於黑客嘅身份仍然係個謎,有傳佢哋係嚟自墨西哥或西班牙嘅頂尖電腦高手。
除咗抽籤疑似造假,連世界盃外圍賽都有假波!英國《每日電訊報》報道,前日被英國國家重案署搗破嘅假波案,已經有兩名新加坡籍疑犯被檢控,一名中間人更爆料:「世界盃外圍賽都有造,我至少造過15場!」佢更表示有一支非洲嘅國家隊已經被操控,假波集團會支付球員約5萬鎊嘅「假波費」,真係好得人驚。
白禮達唔畀黑人做主持
正所謂上樑不正下樑歪,FIFA會長白禮達本身都是非多多,《每日體育報》爆料,世界盃籌委會原本安排黑人明星蘭沙路拉莫斯做抽籤主持,點知畀白禮達Ban咗,自己欽點巴西索女明星莉瑪同白人型男希拔做拍檔,引嚟種族歧視嘅指控。白禮達暫時未有回應,唔知會唔會繼侮辱C朗後再一次道歉呢?
疑似內定世盃分組
A組:巴西、墨西哥、英格蘭、法國
B組:烏拉圭、加納、日本、希臘
C組:哥倫比亞、哥斯達黎加、波斯尼亞、喀麥隆
D組:德國、荷蘭、智利、澳洲
E組:比利時、洪都拉斯、科特迪瓦、意大利
F組:瑞士、俄羅斯、尼日利亞、美國
G組:阿根廷、葡萄牙、伊朗、阿爾及利亞
H組:西班牙、克羅地亞、南韓、厄瓜多爾