昨晨上演嘅歐聯分組賽，阿仙奴喺「死亡F組」主場雙蛋贈馬賽，不過揸住12分嘅「兵工廠」竟然仲未出線，最後一輪要同拿玻里、多蒙特爭奪兩個出線席位，有可能成為歐聯史上最高分出局嘅悲劇主角！阿仙奴嘅倫敦宿敵車路士就好命得多，有伊度奧勇戰受傷嘅車仔，尋日恥辱性輸畀巴素利照樣提早殺入16強，真係恨死隔籬！

車仔輸波晉級，認真羞家。（美聯社圖片）

阿仙奴（紅白衫）雖然已經攞咗12分，但出線席位仲未穩陣。（Getty Images圖片）

韋舒亞梅開二度，助阿仙奴以2:0擊退馬賽。（美聯社圖片）

伊度奧勇戰受傷，車路士今勻賠了夫人又折兵。（美聯社圖片）

3雄對賽成績

歐聯分組形勢

「死亡之組」名副其實夠晒恐怖，阿仙奴尋日迎戰馬賽，韋舒亞開波29秒閃電入波，雖然之後有奧斯爾12碼宴客，但呢位德國國腳下半場助攻韋舒亞入多粒將功贖罪，助「兵工廠」贏2:0輕鬆攞走3分。今仗酋長球場看台星光熠熠，亨利見韋舒亞入波後拍爛手掌，祖爾巴頓就走入馬賽球迷堆撐舊東家。

尾場吞拿玻里3蛋即玩完

不過由於多蒙特喺另一場波主場3:1擊退拿玻里，令形勢出現微妙變化。目前阿仙奴以12分排榜首，拿玻里同多蒙特各得9分，多蒙特最後一輪要贏5戰輸晒嘅馬賽唔難，如果「兵工廠」作客拿玻里輸波，就會出現3隊同得12分嘅局面，到時要計佢哋互相對賽成績，阿仙奴如果輸3球或以上一樣要執包袱！

要知道歐聯史上有4支球隊曾經喺分組賽攞10分出局（雲達不來梅、奧林比亞高斯、基輔戴拿模、燕豪芬），如果今次有球隊12分出局，就會寫下歐聯悲情歷史。「廠長」雲格賽後表示：「12分都未出線，真係匪夷所思！但事實就係咁，我哋一定要完成任務，作客拿玻里會係一大挑戰。」

史浩克唔爭氣悶和星隊

相比阿仙奴，另一支倫敦勁旅車路士就好命得多，尋日作客巴素利全場捱打結果輸0:1，前鋒伊度奧更勇戰受傷，不過爭出線大敵史浩克04喺另一仗悶和布加勒斯特星隊，令車仔攞9分都可以喺E組提前出線！領隊莫連奴賽後都話：「我哋今場波踢得好差，不過其他賽果幫咗我哋一把，呢個係今晚唯一好消息。」

死亡F組最後一輪形勢分析

多蒙特輸波 + 拿玻里贏阿仙奴 = 多蒙特出局

多蒙特失分 + 拿玻里贏阿仙奴 = 多蒙特出局

多蒙特和波 + 拿玻里和阿仙奴 = 拿玻里出局

多蒙特贏波 + 拿玻里贏阿仙奴3球或以上 = 阿仙奴出局

多蒙特贏波 + 拿玻里贏阿仙奴2球或以下 = 拿玻里出局

多蒙特贏波 + 拿玻里失分 = 拿玻里出局

拿玻里輸波 + 任何賽果 = 拿玻里出局