身為球迷，有邊個想睇住愛隊衰？公鹿球迷剛好相反，眼見這支東岸隊伍多年來沒起色，最近發起「Save Our Bucks」行動，打正「贏波冇運行」旗號籌旗落廣告，呼籲公鹿今季Hea打了事，為來屆選秀大會追逐「新大帝」韋堅斯（Andrew Wiggins）鋪路！

自2001年以來，公鹿就從未躋身季後賽，即使去季有新星中鋒辛達斯（Larry Sanders）彈起，無奈球隊開季頭13戰僅錄得兩場勝仗。眼見愛隊持續不振，有球迷組織把心一橫望公鹿繼續衰，（目及）實行放棄今季，藉以換取光明的未來。一個叫「SaveOurBucks」的網站及twitter本周二面世，發起人透過網站狂踩公鹿，指該隊於過去10年僅出產過米高列特（Michael Redd）一位全明星球員，陣營長年欠缺星味連帶入座率亦告下降。

最想「新大帝」來投

為拯救公鹿，網站成立人發起一場籌款活動，希望籌到5,000美元（約3.8萬港元）於12月份登足一個月大廣告，以「贏波冇運行」為口號，呼籲公鹿繼續輸波，以換取高排位選秀籤。該網站發聲明表示：「落廣告只係第一步，我哋希望將訊息傳遞畀公鹿，等佢哋請番個有遠見嘅總經理，然後就Hea打完成球季，攞個前5位選秀權返嚟，為未來而戰。」

據網站公布的民調顯示，公鹿球迷最希望獲得堪薩斯大學、有「新大帝」之稱的準狀元韋堅斯，杜克大學前鋒查巴里柏加（Jabari Parker）及肯塔基大學大前鋒蘭度（Julius Randle）亦是公鹿球迷的心水之選。截至美國時間前日為止，「SaveOurBucks」行動已籌到約3,279美元（約2.5萬港元），距離目標不遠。不過有網民就揶揄球迷組織多餘，笑言公鹿新季戰績差劣，毋須刻意Hea打亦可穩奪狀元籤。

公鹿3大目標逐個捉：韋堅斯 Andrew Wiggins

出生日期：95年2月23日

年齡/國籍：18歲/加拿大

位置/大學：小前鋒/堪薩斯

今季場均數據：16.8分、6.3個籃板、1.5次助攻

查巴里柏加 Jabari Parker

出生日期：95年3月15日

年齡/國籍：18歲/美國

位置/大學：小前鋒/杜克

今季場均數據：23分、8.8個籃板、1.8次封阻

蘭度 Julius Randle

出生日期：94年11月29日

年齡/國籍：18歲/美國

位置/大學：大前鋒/肯塔基

今季場均數據：19.8分、13.7個籃板、2.2次助攻