全城呼喚「大帝」回家！勒邦占士（LeBron James）與熱火的合約明夏屆滿，克利夫蘭球迷最近發動「Come Home LeBron（勒邦回家）」行動，印Tee、登廣告、派季票瓣瓣出齊，誓要游說「大帝」回歸騎士，禮拜四早上熱火造訪騎士實有好戲睇。

NBA常規賽周三秩序

周一戰果

據《俄亥俄州網》報道，1位叫拉治（Josh Raggi）的24歲球迷最近發起「勒邦回家」行動，呼籲克利夫蘭球迷用行動打動占士回歸：「騎士球迷貝亞上年衝落球場求占士回巢，我喺屋企見到呢一幕好感動，開始諗我係咪應該做啲嘢呢？」

年尾進行第二炮攻勢

任職地產經紀的拉治，除了以「勒邦回家」作主題開勻instagram、twitter及社交網站帳號做宣傳之外，今日開始更會在占士母校、聖文森高中附近登足8個禮拜大廣告造勢，並印製了2,000件「勒邦回家」Tee，準備周四向球迷派發。拉治表示：「當日我同貝亞會喺騎士主場門口派Tee，只要球迷着起佢影張相，然後掟上網標誌番「@ComeHomeLebron」口號，就有機會贏到騎士來季季票。」

拉治自爆就今次行動已豪使5萬美元（約38.7萬港元），未來會找贊助商合作，於年尾進行第二炮游說攻勢：「我哋（騎士球迷）唔係求占士回巢，只係想畀佢知道克利夫蘭人民已經原諒佢，同埋騎士唔再係魚腩，佢返嚟會有幫手，一樣可以衝擊總冠軍。」騎士將於本周四主場恭候熱火，消息指有球迷計劃衝落球場勸占士「回家」，屆時場面肯定哄動。