作為周日「金光決戰」唯一嘅「香港製造拳手」，「神奇小子」曹星如（Rex）有機會喺「萬人迷」碧咸等天王巨星面前揮拳作戰，緊張情緒實在難免，Rex為控制體重準備今日過磅，尋日連水都唔敢飲多幾啖，拳手真係唔易做！

曹星如（右）近期積極Keep磅數。

今晨5點「自我上磅」

曹星如備戰對泰國拳手施迪安嘅工夫一絲不苟，佢話：「我成日（尋日）只係食咗一個蘋果、一個梨同飲咗一啖水，因為怕體重會上升，所以又花成粒鐘喺跑步機上，希望盡量減到118磅。」今日過磅儀式約喺早上8點進行，Rex透露會清晨5時半起身「自我上磅」，必要時會再爭取時間上跑步機「最後衝刺」。

「我希望保持集中，心情唔好太緊張，我喺澳門見過對手，仲同佢握手閒談，施迪安比我矮啲啲，希望到時我可以發揮水準啦！」曹星如之戰被安排喺周日擂台嘅第4場進行，至於重頭戰就由菲律賓「拳霸」帕克奧火併美國里奧斯，爭逐WBO次中量級拳王頭銜。