「兄弟打吡日」細佬發威！昨日NBA出現奇景，聯盟史上首次同日有3仗「兄弟對決」，計落有加素兄弟、施拿兄弟及普林李爾兄弟同室操戈，更巧合是細佬効力一方全部獲勝，莫非「做大嘅要讓吓啲細」？

普林李爾前途無限

3對兄弟當中，以普林李爾打吡最新鮮，兩兄弟職業生涯首次對壘，父母及大班親戚亦齊齊入場打氣。最終細佬美臣普林李爾（Mason Plumlee）効力的籃網經過加時後以100:98險勝太陽，落阿哥普林李爾（Miles Plumlee）面。

細佬在屋企人面前攞彩，但查實今季躋身太陽正選行列的哥哥更有前途。太陽今季由「新秀主帥」漢拿錫（Jeff Hornacek）領軍，這位名將昔日於太陽發展隊伍睇住普林李爾大，坐正後更加捧愛將上位，最重要是普林李爾青靚白淨冧死女，相信太陽靠普林李爾的周邊商品都肯定賺一大筆，會方唔錫到你燶就假咯！