勒邦父子反轉籃壇!有其父必有其子,勒邦占士(Lebron James)於NBA戰場隻手遮天,其長子「占士仔(LeBron James Jr.)」亦繼承了「大帝」DNA,上周五在校際賽貢獻「準三雙」數據,甚有老竇的全能風範。阿爸「大帝」昨日則攻入39分,率領熱火主場以110:104勇挫小牛,你兩仔爺玩晒啦!

占士(右)見到個仔咁叻,連自己都打得零舍投入。(美聯社圖片)

NBA常規賽周一秩序

周六戰果

占士仔打法似足韋迪

現年9歲的「小占仔」不單止與老竇餅印一樣,就連打法都似到十足十,「大帝」昨日透過instagram上載了一段囝囝的校際賽短片,「Bronny」引球出擊連過幾關後剷籃得手,全場貢獻25分、8個籃板及8次助攻,就連「大帝」都讚不絕口:「Bronny貢獻25-8-8,幾下歐洲步都好有韋迪(Dwyane Wade)影子,最重要係佢打法無私!」

美主持人種族歧視林書豪

上籃似「閃電俠」,平時又有「大帝」及熱火老將祖雲侯活(Juwan Howard)做指導,「占士仔」前途肯定無可限量。阿仔光芒四射,老竇又點可以失威?「大帝」昨日就攻入全場最高的39分,帶領熱火主場以6分之差做低小牛。賽後「Bronny」更將一幅親手畫的MVP圖畫送給占士,「大帝」梗係笑到見牙唔見眼啦。

熱火戰績重上正軌,足足有5位球星入圍昨晨公布的2014全明星賽候選名單,至於生涯首次入圍的火箭控衞林書豪(Jeremy Lin),就被《ESPN》主持人Jorge Andres於節目上以「Cooking with peanut oil」攻擊,以煮食花生油時產生大量油煙來揶揄J.Lin是「亞洲垃圾」。事後Andres惹來大眾抨擊,並公開道歉補鑊。