「紫金王朝」沒落，加上王牌高比拜仁（Kobe Bryant）因傷肯定緣盡季初賽事，湖人新季能闖入季後賽已算達標，陣中雙塔卡文（Chris Kaman）及沙格（Robert Scare）決心自強孭起隊波，最近就夾份買牛歎，靠新鮮牛肉及牛骨湯迎接新球季！

夾份買成隻牛

德國中鋒卡文聽從訓練師建議，季前專程到農場揀選食草而非吃飼料長大的牛，培養食新鮮牛肉習慣，並以牛骨煲湯飲，藉此強化關節、韌帶及肌腱。與卡文夾份買下整頭牛的沙格向《ESPN》稱：「食咗新鮮牛肉之後，自己嘅脂肪百分比由6%跌到3%，能量多咗之餘病痛都少埋，不過為咗雪藏半隻牛，我使咗成千美元買咗部大雪櫃，好肉赤！」

湖人雙塔擦牛迎新季，反觀高比復出之日仍是個謎，教練迪安東尼（Mike D'Antoni）前日透露，「小飛俠」仍未能跑步，隨時要到明年1月才能復出。