新季NBA下周三開咧，列強新款波衫陸續出爐，繼紐約人的橙色新波衫曝光之後，西岸勁旅馬刺亦「唔執輸」，昨日宣布推出迷彩新波衫掠水。意甲勁旅拿玻里的迷彩波衫大賣，馬刺今次就以「向軍人致敬」作牌頭Sell衫，並由李安納（Kawhi Leonard）及丹尼格連（Danny Green）擔任模特兒，擺明要捧紅兩位新骨幹喎！

季前賽92:109輸畀火箭

聖安東尼奧有「軍事之城」綽號，況且馬刺教練普波維治（Greg Popovich）出身於空軍學院，配合迷彩波衫可謂襯到絕！「新紮Model」丹尼格連表示：「我時時刻刻都提醒自己，唔好忘記一班為國家賣命嘅軍人，能夠透過件迷彩波衫向現役同退役軍人致敬係我嘅榮幸。」

昨於季前賽以92:109不敵德州新勁敵火箭的馬刺，賽後於官網宣布，球隊將於下月14日主場鬥巫師，以及明年2月29日美國軍隊節對山貓的兩場賽事，以迷彩波衫亮相，球迷記住（目及）實。