熱火球星韋迪（Dwyane Wade）好爸爸形象深入民心，但據《邁阿密先驅報》消息，原來韋迪為咗唔想畀前妻芬卓絲（Siohvaughn Funches）探兩個小朋友，竟然要求對方進行精神鑑定！「閃電俠」使唔使去到咁盡先？

估唔到韋迪份人狠到屈自己前妻有精神病。（美聯社圖片）

Share現任女友性感照

韋迪喺08年入紙申請同芬卓絲離婚，期間雙方不斷就兩位小朋友嘅撫養權同贍養費問題對簿公堂，美媒尋日仲話，原來「閃電俠」今年7月曾經向法院要求為早排窮到要瞓街嘅芬卓絲進行精神鑑定，實行要屈前妻精神有問題，唔畀佢見兩個小朋友，不過法院已經拒絕呢項要求。雖然那渣招行唔通，但一樣無損韋迪嘅靚靚心情，日前佢就喺網上Share現任女友尤尼恩（Gabrielle Union）嘅性感相，冇人冇物嘅芬卓絲見到肯定眼火爆都似！

奧登復出鋤樽

「閃電俠」場內場外都一樣心狠手辣，佢尋日喺季前賽攻入25分，率領熱火以108:95砌低塘鵝，不過講到焦點人物，肯定係時隔1,418日終於回歸NBA戰場嘅奧登（Greg Oden）。呢位07年狀元雖然只係落場4分鐘，但第一次掂波就鋤爆樽搞到全場球迷High晒，怪唔之連勒邦占士（LeBron James）都話想破戒飲酒賀奧登強勢回歸啦！